روايه .. ياليتها في يميني وأتعصى بها روايه سعوديه رائعه ...

تذكير بمساهمة فاتح الموضوع :

بسم الله الرحمن الرحيم




نتوه بعالما ونتخبط به بين تلك الأروقه


وأجمل صدف الحياة تجمع قلوبنا ليترجمو تلك الأحاسيس الطاهره

فتكتمل
الحلقات المفرغه .. لينير دروبها ضوء قمر خافت

وللذكريات شغب طفولة مازالت
تنبض بهم .. وغياب يقتلنا ويأسرنا

رحيل .. دون إنذار .. كانت هي حكايتهم
التي تركوها خلفهم

بقلم .. أم بريشه !!

سأكتبها هنا وكلي أمل بأن
تجد الإستحسان منكم

روايتي الأولى حصريه فقط في منتديات ترانيم الأمل


شخصيات الروايه 80 بالمئه حقيقه وليس بها إختلاف عما نمر به في حياتنا
الشيء الكثير


رأيكم يهمني ..مهما كان.. بقله حروفكم.. فبصمتكم أجمل من
ذلك














الفصل
الأول...


قامت أم عبد الله في أول يوم دراسي من بدري وقومت عيالها
للصلاة ...

يا بنت جهزي الفطور أخواتك وخليهم يجهزون عشان ما تتأخرون عن
المدرسة ... إن شاء الله يمه

البتول تعالي ساعدي رغد ومشطي شعرها ...
البتول : أمل خلصيها أنتي تكفين أبروح أجهز لكم الفطور

أمل: وين أمي ليه ما
جهزته ؟؟

البتول : إستحي على وجهك يا بنت الحلال ووبعدين أمي قالت لي أسويه
لكم خلاص ما فيها شي

وش تبون تاكلون ؟؟



صاحت أمل بصوت عالي
أنا سوي لي بيض

البتول :وإنتي يالهنوف وورغد وش تبون أسوي لكم
؟؟

الهنوف : عادي أي شي بس نفك ريقنا عالصبح ونروح.. قامت رغد من الكرسي
وراحت تركض للمطبخ

طلعت علبه الكورن فليكس وقالت وهي مبتسمه أنا أبي من ذا
..

قرصتها البتول من خدودها وهي تقول لها ابشري كم عندنا من رغد
..

ضحكت رغد وهي تقول وحده هي أنا أخر العنقود

خلصت الفطور وراحت
تجهز للمدرسه وبما أنها صارت أولى متوسط فتعتبر نفسها هي الكبيرة مع إن في اللي
أكبر منها

بس متزوجين وهي والهنوف بنفس العمر لأنهم توأم
...




يلا يالهنوف الساعه ست ونص تأخرنا وباقي نمشي للمدرسه وقبل
كذا نوصل أمل ورغد الابتدائيه

طيب طيب أعصابك المدرسه موب طايره روقي
..

البتول: يا برودك والله المهم يلا قبل الطابور ولا تنسين إننا بأول سنه
دراسيه علينا أنا وانتي

وبصراحه متخوفه بالحيل.....

الهنوف :
لاتخافين ولا شي هي مدرسه اللي يشوفك يقول أولى ابتدائي أهجدي لاأهفك بالعلبه


هههههههه طيب امشي قدامي ...

بعد اسبوع


رجعت أم ماهر وعيالها من السفر وبدأت ايمان تجهز لملكتها واللي راح تكون بعد يومين والزواج بعد شهر بالضبط


وليد عرف بالسالفه اللي صارت في بيت عمهم .. عزم خالد في بيتهم يبغى يعرف وش اللي صار بالضبط ... وليد : حيا الله خالد

خالد : الله يحيك ويبقيك وبعد السواليف سأله عن اللي صار والمشاكل اللي ببيتهم حكى خالد كل شي من الاستراحه لين المشكله اللي صارت ودخول بتول للمستشفى

عصب وليد: والله هالولد يبيله تربيه من البدايه لا تزعل من كلامي ياخالد انتم عيال عمي وقبل كذا احنا تربينا مع بعض

خالد : عجزت معاه ياوليد وبعدين تركي دمه حار وعلى طول يعصب وهالإثنين مايتفقون مع بعض ابدا

وليد : وش اخبار اختك الحين

خالد : صارت زوينه الحمدلله وبدور موب مقصره كل يوم تجي عندهم وانا كل مافضيت مريت اشوفهم

وعبد الله مختفي من ذاك اليوم

تنهد وليد وقال : خلي عبد الله علي لكن ماابي اشد عليه ابيه يجيني برجوله

خالد : كفو والله ياولد العم

وليد : كفوك الطيب .. اجل عشاك عندنا اليوم ...

قام خالد : لا والله ماابي اتعب خالتي المره مسويه العشا وتحتريني توصيني على شي ؟

وليد ابد سلامتك .. وصله لين باب السيارة وقبل لا يودعه قال : هالله هالله في خواتك ياخلود

خالد : ابتسم بحب لهذا الإنسان وهو يأشر على خشمه ودعه وراح ..



بيت أم عبد الله ...


جلست بدور تتعشى مع أخواتها وتمازحهم وشوي تخليهم يضحكون تحاول تغير جوهم ابتسمت للبتول : ليه ماتاكلين يالعصقوله

البتول : اكلت

الهنوف : قصدها نقرت مثل العصافير .. بالله هذا تسمينه أكل يابنت الحلال اعلمك كيف تاكلين ؟؟

ناظريني بس والكل عيونهم عالهنوف اللي أخذت قطعه كبيره من الخبز وحطت فيها البيض وكبت الشطه كب وحطتها بفمها والكل طارت عيونهم لان الخبز مره كبيره الا وتغص الهنوف خلتهم ضحكو عليها ...

بدور : بغيتي تموتين شكرا حبيبتي مانبي نصايحك اللي تودينا القبر .. وانتي يابتول كلي زين ترى احلام قالت لي اذا ماانتبهتي على نفسك ماراح تجيب لك الكراسه

البتول : حاااضر


قامت بدور تشوف امها اللي مازالت زعلانه على ولدها

بدور : أخذتي دواك يمه ؟؟

امها : ايه اخذته تبين شي ..

جلست بدور قربها وحطت يدها على كتف امها : يمه حبيبتي لي متى بتجلسين زعلانه ..

يمه الله يهداك كلنا عارفين خطأ عبد الله وسيرته بكل لسان خلي أخواني يعدلونه قبل لا يضيع من يدنا مره وحده

ام عبد الله : الله يهديه ويصلح حاله إن شاء الله .. ابتسمت بدور لأمها وهي تقول : إيه كذا ادعيله وادعي للجميع يمه





بيت ابو ناصر


بعد ماشافها وتمت الموافقه

ابو ريان : خير البر عاجله يابو ناصر ولا وشلون

أبو ناصر : والله بهالأمور ناخذ رأي الحريم لان تعرف العروس لازم تجهز نفسها قبل ويبي لها أكثر من ثلاث شهور

أبو ريان : خلاص أجل كلم أهلك واللي تتفقون عليه بلغونا وحنا حاضرين

ابو ناصر : سلمت يابو ريان ماعليك زود


ناصر : الف مبروك يا ريان والله يوفقكم ان شاء الله

ريان : الله يبارك بعمرك يالنسي وعقبالك

ناصر : قريب ان شاء الله



عند الحريم



استانست أم ريان على مرة ولدها وأعجبت بأدبها وأخلاقها العاليه

أم ناصر : بناتك متزوجات ياأم ريان ؟

أم ريان : ثنتين بس والصغيره توها تدرس بالثانويه

أم ناصر وهي تصب القهوه : ماشاء الله تبارك الرحمن الله يوفقها ان شاء الله ويسمعنا عنهم الأخبار الزينه

مرام : يمه أبوي يقول قلطو العشا ..

قامو كل البنات وساعدو بعض وكل وحده ماتبي ليلى تشيل شي رغم إنها تعارضهم بس لأنهم فرحانين فيها وبأخوهم حبو يساعدونها بكل شي..

بعد العشا راحو أهل ريان بيتهم وجلسو عيال أبو ناصر يسولفون عن اللي صار اليوم

قاطعتهم مرام : يمه وش فيها أم عبد الله والبنات ماجو عندنا اليوم ؟

أم ناصر : بنتها البتول تعبانه

مرام : ليه وش فيها ؟؟

ليلى : وش فيك أنتي اكلتي أمي بأسئلتك تقولك البنت تعبانه فهمتي يعني إدعي لها ان الله يشافيها

مرام : وع مالقيتي الا ادعي لذي المتوحده

أبو ناصر : مررراااام

سم ييبه

أبو ناصر : استغفري ربك لا يبلاك يابنتي والبيوت أسرار ومحدن داري عنها الا الواحد الاحد

الكل : ونعم بالله




بعدها بكم يوم



في بيت أم ماهر العصر


الكل يجهز للملكه روشت أميره عيالها ولبستهم ثياب .. قرب منها مهند وهو يسألها

مهند : ماما انتي بتجيبين نونو غيري صح ؟

ضمت أميرة ولدها بقوه وهي تقول له : انت بتصير كبير والنونو صغير مره

مهند : انا احبك مللللللللله انتي وبابا ومؤيد


دخل ماهر عليهم ولمهم بصدره : وانا احبكم اكثر منكم كلكم ويالله ياحبيبتي جهزي نفسك ابيك تكونين أميرة الحفل يعني أسم على مسمى

ضحكت اميره بخجل : تامر أمر ياعيون أميرة وقلبها

ا




ملكه إيمان


الكل كان فرحان وامل مو سايعتها الفرحه بشوفه ناهد وكل شوي يقومون يرقصون

دخل أصيل ولبسها شبكهتها وراحو للمجلس اللي كان مجهز لهم


في مجلس الرجال ..


ماهر فرحان لأخته ولأنه من زمان عن جمعه العائله فكل شوي يسولف مع واحد

سأله خالد : ماودك تسكن هنا .. ماوحشتك جمعتنا ياكوتش

ماهر : ويين ينقلوني ورتبتي في البحريه وش أسوي فيها لاتكون تقصد أرجع مكاتب مثل أول

ضحك تركي : ليه وش فيها المكاتب والا تعودت عالبحر

ماهر : والله البحر متعب بس شغل مضبوط ...الا كأنكم ناقصين ياعيال عمي أجل وينه عبود ؟

تضايق تركي من هالسيره لكن خالد غير الموضوع وجلسو يسولفون لين قلطهم وليد عالبوفيه



بعدها بكم ساعه

أم ماهر : وش رايك يأام عبد الله تنامون عندنا اليوم وش زينها هاللمه الحلوه

أم عبد الله : والله ياخويتي نسيت أكل دواي اليوم والضغط لاعب فيني ماغير يرتفع كل شوي

نطت الهنوف وهي تقول : لا يمه البتول جابت أدويتك تكفين تكفين خلينا معهم اليوم نبي نستانس أكثر

خزتها أم عبد الله بعينها خلتها سكتت مره وحد .. الا على دخلت أميرة : خالتي ماشفتي مهند ؟؟

أم ماهر : لا والله ماشفته يمكن يلعب مع أخوه مؤيد بالحديقه روحي شوفيهم

بدور : كلمي أبوه يطلع يشوفه بدالك وانتي ارتاحي مع هالثقل اللي ببطنك

أتصلت أميره بزوجها وقالت له .. طلع يشوف عياله لقى مؤيد يلعب بالمرجيحه وكل شوي تغفى عينه

ماهر : مؤيد حبيبي وينه أخوك وليه مادخلت عند ماما اذا فيك نوم

مؤيد: كان راكب بسيارتك من اول وشفته يأشر لي بس أنا ماابي ألعب معاه

ماهر : طيب حبيبي روح شوف ماما وخليها تبدل لك عشان تنام

راح مؤيد لأمه .. حاول ماهر يفتح باب السيارة لقاها مقفله وولده موموجود داخلها ..

فتح السيارة برموت الكنترول ونط للمرتبه الثانيه والفاجعه انه لقى ولده منكوس على راسه ولا يتحرك يوم سحبه الا الكل يسمع صرخته

وهو ينادي بإسم ولده ..

أميرة : يمه بسم الله وش فيه ولدي ؟؟

طلعو الشباب كلهم يشوفون وش السالفه والحريم يناظرونهم من الدريشه عل وعسى يعرفون وش اللي صار

تقدم وليد من أخوه وشاف ولده بحضنه وعيونه شاخصه لفوق ولونه ازرق على طول سحب الولد من يد أبوه

وحاول يسوي له تنفس صناعي لكن مافي استجابه نادى خالد يساعده وطيران على المستشفى وبعد كم دقيقه مرت عليهم طلع الدكتور وهو يقول : الولد يطلبكم الحل

طاح ماهر على رجوله مو مصدق انه فقد ولده وسمع بكا زوجته اللي لحقته هي وام ماهر وماتحملت الموقف واغمى عليها

تلطم وليد وحاول يوقف اخوه الشبه عاجز

وليد : عظم الله أجرك ياخوي طير من طيور الجنه

بكى ماهر على فقدان ولده ..جلس عالكرسي يترحم عليه ويطلب الله ان يربط على قلبه وقلب زوجته


ثاني يوم بدا العزا.. مرت عليهم هالثلاث الأيام من أصعب مايكون ولدت اميره وهي بالثامن وجابت بنت تشبه أبوها كثيير

لكن رح يبقى مهند بقلوبهم للأبد

الفصل الرابع ..


ناهد : يا سرع الدنيا الله يرحمك يامهند مر على وفاته للحين 3 شهور وكأن العزا كان امس..

قاطعتها نوف : الله يرحمه كم باقي وندخل عالاختبارت ؟؟

ناهد : يمكن شهر أو أقل مدري والله عسى الله يوفقنا أنا وياك وبنات عمي يااااااارب

نوف : مالت عليك وعلى وبنات عمك اقول ضفي وجهك لا أحذفك بالمزهريه

دخلت عليهم إيمان وهي منزعجه من أصوات أخواتها : وبعدين معاكم انتي وياها مانرتاح من ازعاجكم شوي

جا وليد من وراها وهو كاشخ : شنقل ومنقل ماراح يهجدون الا بالعصى

شهقت ناهد :هاااا اهون عليك يابعدي

لمها وليد بحضنه وباس راسها : لا ماتهونين علي .. عطى نظره لنوف وهو طالع .. تامروني على شي

إيمان : وين بتروح هالحزه ياولييد بعدين نسيت اصيل الليله جاي عالعشا

وليد : بروح للشركه بخلص كم شغله وماراح اتأخر وبعدين زوجك جاي يشوفك وش دخلني أقعد عذول بينكم

استحت ايمان ونزلت راسها .. طلع وليد

نوف : ايمان انتو اجلتو زواجكم لمتى ؟

إيمان : لين الله يكتب وبعدين تو مامر على وفاه مهند الا كم شهر الله يرحمه

دمعت عيون ناهد وهي تتذكر أخوها اللي تغيرت نفسيته حيييل بعد وفاة ولده وصار يجهد نفسه بالشغل ...

دعت له بقلبها ان الله يخفف عنه حزنه ويربط على قلبه مسحت دموعها وتسحبت من غرفه أختها

دخلت غرفتها اللي تحب تجلس فيها كثيير تذكرت أمل ووقفه بيت عمهم معاهم أيام العزا ..

وحشتيني أمووول لي شهر ماشفتك الله يهدي مرت عمي كل مااتصلت صرفتني وشلون أوصل لها ؟؟

فتحت اللاب حقها وسجلت دخولها بالمسن لقت وحده من صديقاتهاا

ناهد ( دلوعه أخوها )

سلاااااام خوخه وش أخر أخبارك

خلود ( لمعه عيوني ياجنوني )

وعليكم السلام انا منيحا كيفك انتي

ناهد ( دلوعه أخوها )

ماشي حالي ههههههههههههه وش فيك قلبتي سوريه اوب حلو

خلود (لمعه عيوني ياجنوني )

خخخخخ انقلعي تعودتي عالتهزيئ مني عالعموم كنت بطس مع خواتي وش عندك

ناهد ( دلوعه أخوها )

أبد ملانه ماعندي شي حبيت اسولف معك ودامك طالعه روحي لا أأخرك

خلود ( لمعه عيوني ياجنوني )

إدخلي دردشه وسولفي وهايطي لين يطيح اللي براسك

ناهد ( دلوعه أخوها )

خخخخ اوكي يلا اطلعي وسلمي عالبنات أشوفك بكره بالمدرسه

خلود ( لمعه عيوني ياجنوني )

أوكيي يوصل مع السلامه


انسدحت ناهد تناظر السقف عدلت جلستها وفكره انها تدخل الشات مو عاجبتها لكن دخلت عشان صديقاتها اللي عرفوها عليه تحب تستهبل وبعدها تطلع ..

..

سجلت دخولها وبدت بالتسليه واللعب مع الموجودين .. فجأه جاها برايفت ( محادثه خاصه )

بيق بوس : هآآآي

دلوعه : وعليكم الهاي

بيق بوس : وينك من فتره مادخلتي

دلوعه : وش عليك إنت متى أدخل أو لا

بيق بوس : حيلك يابنت الناس سألت لأني مالقيتك مع القروب من فتره

دلوعه : اخلص علي وش تبي الحين

بيق بوس : أبي سلامتك وبقولك لا تبطين علينا لاننا فقدناك

دلوعه : ماتفقدون غالي تبي شي ثاني ؟

بيق بوس : لا تسلمين باي

طلعت ناهد من الشات بكبره وهي ماودها تسولف مع شباب وتخون أههلها وتربيتها وقالت بنفسها انها راح تحاول تخفف من دخولها لين ماتنقطع نهائيا منه



في الشقه


جلس ابراهيم ينتظر طلال بعد ماجاب له الأمانه اللي طالبها منه

دخل طلال ورمى الفلوس عالطاوله اللي قدامه وهو مبتسم : تفضل هذا حقك ياكوتش وابيك تختفي عالأنظار لين مااعطيك الامان اوكي

إبراهيم : تم ياعمي الحين بروح تبي شي ثاني طال عمرك

طلال : هههههههههههههههه الحين صرنا طال عمرك .. لا ماابي اذلف عن وجهي .....طلع ابراهيم وجلس طلال يرتب للخطه والتنفيذ اللي راح يكون على في الإجازه الصيفيه

والله وطحت ومحد سمى عليك ياعبود الكلب ههههههههههههه

رن جواله وسمع حس امه اللي يرد فيه الروح

طلال : سم يمه

أم طلال : سم الله عدوك حبيبي متى بتمرني يالغالي

طلال : الحين امرك ياعيون ولدك ابشري عشر دقايق وانا عندك

أم طلال : سسق بالهداوه ياوليدي ماابي أخسرك مثل ماخسرت اختك الله يغفر لها ويرحمها

كتم طلال أنفاسه وبقلبه يردد والله وبأخذ حقك ياخيه ... انتبه لصوت امه وهي تنادي عليه

طلال : تامرين يمه خلي الخدامه تلبسك العبايه وانا الحين بجيك فمان الله

طلع طلال من الشقه وذكريات أخته وحبيبته مافارقت باله ماتت صغيره ماتت بعد ماانلعب فيها



قبل سنه ..


دخل طلال لبيتهم وهو ينادي على أمه عشان يحطون الغدا سأل الخدامه عن أخته قالت له إنها ماطلعت اليوم كله من غرفتها ..

صعد الدرج وقبل لا يدخل غرفته مر على أخته هاجر طق الباب عليها اكثر من مره وماسمع رد لكن حط بباله انها يمكن تكون نايمه هالوقت وصوت التكييف أكد له هالشي

نزل ولقى أمه وابوه جالسين ينتظرونهم عشان يتغدون جميع

أبوطلال : وراك مامريت على أختك تجي تتغدا معنا ؟

طلال : مريت يبه لقيتها نايمه وانت تعرف هاجر ونومها الثقيل لو تنفجر قنبله ماصحت

أم طلال : إي والله يابو طلال ماتعرف بنتك الله يصلحها والبارح كانت تعبانه وماغير تتراجف ماادري وش بلاها ..

أبو طلال: خلاص لا جا العصر شوفيها كانها تعبانه وديناها الطبيب يفحصها

طلال : ابشر يبه أنا بوديهم كملو غداهم وصعد طلال يريح جسمه وينام ساعتين

بعد ساعه ..

صحى طلال على صوت أمه اللي تصرخ بأعلى صوتها وتنادي على هاجر طلع مفزوع وهو موب عارف وش السالفه لقى أمه واقفه عند باب أخته وهي تصارخ ومعصبه

طلال: وش فيك يمه خرعتيني الله يهداك

أم طلال : اختك اللي ماترد علي من البارح بغرفتها لا طلعت ولا كلت لها شي والحين ماترد

طلال : انزين الحين اشوفها يمه .. طق الباب عليها ولا ردت طق بأقوى ماعنده ونفس الشي ماجاه رد .. مايدري ليه حس بنغزات بقلبه وهو واقف عالباب حاول يكسر الباب ..

نادى عالخدامه : كوماري وين مفتاح الباب الثاني ؟؟

كوماري : مع هاجر بابا

عصب طلال وحط كل حرته بالباب لين انكسر دخل بسرعه كانت الغرفه تسبح بالظلام والتكييف عالي مره فتح النور وتقرب من السرير ..

شاف أخته نايمه حاول يصحيها لكن ماتقوم رفعها من سريرها وهي صايره مثل اللعبه بيده

هزها بقوه وهو ينادي باسمها لكن لاحياة لمن تنادي التفت على امه اللي تسندت عالباب من الخوف .. وش فيها اختك ياطلال ؟؟

طلال : مدري يمه هاتو عباتها بوديها المستشفى

تقربت ام طلال ولمست جسد بنتها البارد وعيونها تعلقت بولدها وكأنها تقول له اختك راحت

ركض طلال باخته لأقرب مستشفى اللي اعلنو وفاتها ..

الطيب : اختك للأسف ماتت منتحره بحبوب الله يكون بعونكم ابي الوالد اذا سمحت

طلال : وش تقول يادكتور اختي انا ماتت ؟؟ وشلون منتحره!! دكتور هذي اختي صغيره ماتعرف وش معنى انتحار ..

الطيب : تعوذ من الشيطان اخ طلال وادعي لها ان ربي يغفر لها ويرحمها ولو سمحت ياليت تخلي الوالد يمر علي بمكتبي



بعد فتره وصلت ام طلال وابوه وهم موب عارفين وش اللي صار

حضن طلال أممه وهو يصيح : مات يمه ماتت هاجر

ام طلال : خلاص !! بنتي راحت مني .. معد اشوفها من تالي ياطلال

اويل قلبي عليك يابنتي وفجأه تراخت ام طلال من يد ولدها شافوها الممرضات ونقلوها على غرفه عشان يشوفها الدكتور ويعطيها مهدئ



بمكتب الدكتور ..


للأسف يا أبو طلال بنتك ماتت منتحره وبعد الكشف عليها اكتشفنا انها فقدت عذريتها

ابو طلال : بنتي صغيره يادكتور تو عمرها 15 سنه وشلون يصير لها هالشي وينا عنها وليه ماحسينا فيها

الدكتور : والله هالسؤال مايتوجه لي انا اللي اسالك وينكم عنها وبعدين البنت في سن مراهقه

كان من المفروض تتابعونها ولا تخلونها توصل لهالمواصيل لكن الحين ماينفع هالكلام والله يرحمها ويغفر لها

طلع أبو طلال مصدوم من الكلام اللي سمعه لقى ولده واقف وعيونه حمر من كثر الصياح

سأله : وينها أمك ؟؟

طلال : داخل بالغرفه طاحت علي الدكتور عندها

طلع الدكتور والممرضات يدفون سرير امه قدام عيونهم

أبو طلال: وش فيها يادكتور طمني

الدكتور: للأسف جتها جلطه بالقلب وراح نعمل لها عمليه قسطره دعواتكم لها

ابو طلال : لا حول ولا قوه الا بالله العلي العظيم

إنا لله وإنا اليه لراجعون

جلس طلال يسأل ابوه عن أخته ووش سبب انتحارها علمه ابوه بكل اللي قاله الطبيب ..

عصب طلال وماتمالك نفسه وجلس يصيح ويتوعد انه بياخذ حق اخته من اللي طعن بشرفها......

بعد العزا بكم يوم دخل طلال وجلس على سرير اخته وهو يتأمل الغرفه الهاديه من ازعاجها ورجتها ,,,

جلس يفكر وش اللي خلاها تغلط هالغلطه اللي كلفتها عمرها آآه الله يرحمك ياهاجر ويغفر لك

فتح درج الكومدينه القريب من سريرها جلس يشوف اغراضها .. فتح الدرج الثاني لقى فيه كتبها المدرسيه ودفتر لونه أحمر عليه قلوب سحب الدفتر وجلس يتأمله ..

فتح أول صفحه وقرا اللي كتبته عن خواطرها كان دايم يمدح خطها اخذا الدفتر وراح لغرفته

بدا يقرا كل صفحه وعلامات الصدمه كل مالها وتكبر وعيونه اللي شوي ووتطلع من محاجرها من الكلام والاشياء اللي صارت لها ..

كتبت كل صغيره وكبيره وعن المجرم اللي لعب فيها وعن حبه لها ...

وصل لأخر صفحه وكانت قبل لاتموت بيوم .. قالت لهم انها بتروح مع صديقتها للسوق ..

كانت كاتبه

الرحيل ..

ها انا ذا أخط أخر حروف لي
واسفي على هذه النهايه البائسه
سأرحل وقبل هذا الرحيل
ارجوكم حللوني
أمي وأبي طلال
لا استحق العيش ممعكم فأنا عار بالنسبه
ادعو لي بأن يغفر الله خطيئتي
وداعاً


طاحت دموع طلال حزن والم وقهر وغضب ومن بعدها تغيرت حياة طلال

وصل لأمه وحمل كرسيها ودخلها السياره لانها ماتقدر تمشي من عقب الجلطه

ركب طلال وهو يسأل : آمريني يالغاليه وين ودك فيه

أم طلال : ودني المزرعه ..

طلال : تامرين امر ...




جت مرام وهي تركض ليلى وصلو أهل رجلك امي تقول تعالي سلمي

بعدتها ليلى وهي تزين لبسها كذا أوكي ؟؟

ضحكت مرام وهي ملاحظه توتر اختها : أيه روعه روحي يلا لا تجيك امي ..طلعت ليلى ومرام وراها ودخلت وهي منزله راسها سلمت على أم ريان وأخواته

أم ريان : ما شاء الله وش هالزين يابنيتي الله يحفظك ويوفقكم

أم ناصر : اميين ياوخيتي ..

تقربت ذكرى من أمها : يمه متى نروح للبيت

أم ريان : أص ولا كلمه وبعدين تونا واصلين وش بيقولون عنا

ذكرى: يمممممه

أم ريان : وصمه وش عندك انتي اليوم

غفران : يمه عليها اختبار ولا ذاكرت وهذي ثالث لزم نسبه

قاطعتهم ام ناصر وهي تصب القهوه تفضلي ياام ريان .. خذت فنجالها وهي تقول زاد فضلكم

اخذت مرام الدله من أمها وصبت للبنات ويوم جت تعطي ليلى اهتزت يدها وطاح الفنجان منها خلت البنات يضحكون .

ضحكت معاهم على رفالتها .. قامت ليلى وهي تستسمح منهم وصبت القهوه بدل أختها

مرام : انتي بأي سنه ياغفران ؟

جلست غفران بقربها وهي تتميلح : سنه 3 متوسط وانتي ..

ضحكت مرام بصوت عالي لان غفران حجمها صغير مره ولاهوب مبين عليها

شدتها ليلى من تنورتها مرامو وبعدين معك ..

مرام: خخخخخ وش سويييت احم أنا اولى متوسط وبعد بكره بصير ثاني

ههههههههههههههههه ضربتها ذكرى على كتفها : وش فيك مسخنه انتي

وشلون بعد بكره ..

مرام : مابقى عالاختبارت شي ونخلص واصير ثاني وبعد بكره يعني القريب العاجل

ليلى : ان اشهد ان مافيك ذره عقل يا بنت ابليس

مرام :: انا بنت ابليس ياوجه الناقه

ذكرى : ههههههههههههههههههههه خلاص تكفون لا تتهاوشون انا بنت ابليس وغفران وجه الناقه

غفران : ناقه بعينك والله

شكل امي عجبتها السوالف ويا امك ونست ان وراك اختبار

ذكرى ومرام بنفس الصوت : وجع لا تذكرينا

ضحك الكل عالهبال وكملو سوواليفهم



بمجلس بيت ام وليد ..


كان يتأمل ايمان اللي تعبته عبال ماوافقت عليه حاس انها تغيرت كثير بعد وفاة ولد أخوها حب انه يغير جوها شوي :

حبيت ابلغك ان فلتنا خلصت من شهر ومابقى الا الأثاث تبين نجيبه من هنا او من برا

ايمان : براحتك يااصيل

اصيل : إيمان انت مره موب عاجبتني صح اللي مريتو فيه صعب لكن الحياة مستمره ولو كل انسان وقفت حياته على فقد شخص غالي

على قلبه كان مااستمرت حياتنا حاولي تتناسي لان لو أقولك انسي أنا عارف انه صعب عليك وعلى الكل قولي الحمدلله هو طير من طيور الجنه ان شاء الله وسعي صدرك واذكري ربك

إيمان : لا اله الا الله والله يااصيل مشتاقه له حييل ويوم اشوف حال اخوي احس اني عاجزه مااقدر اسوي له شي ....

أصيل : وبعد .. تتوقعين لو حزننا يرجع اللي فقدناهم والله لأحزن العمر كله لكن هذي مشيئه الرحمن ولا اعتراض عليها كلنا لها كل من عليها فان ويبقى وجه ربك ذو الجلال والإكرام

إيمان : ونعم بالله معليش يااصيل تحملني شوي وان شاء الله مع الأيام تتغير حالتي

أصيل : انا تحملت هالعمر كله عشان اتزوجك تتوقعين اني مااقدر اصبر وبعدين ودي اشوف ابتسامتك الحلوة

ايتسمت ايمان بخجل واستاذنت منه تحط العشا لهم

وهي طالعه صادفت وليد جاي.. سلم عليها وراح يجلس مع اصيل

دخلت المطبخ لقت نوف ماسكه كاسه العصير وسرحانه قربت منها بهدوء وهي تسأل : فيك شي حبيبتي ؟؟

رفعت نوف راسها وناظرت لأختها من غير ماتتكلم

إيمان : وش فيك نوف وش اللي شاغل تفكيرك

نوف : انتي

ايمان : أنا ؟؟ وش فيني انا

نوف : بعد كم شهر بتتزوجين وتروحين وتخلينا بروحنا

إيمان : وشلون اخليكم بروحكم ياحبيبتي حتى ان تزوجت ماراح انساكم كل يوم بتلقيني عندكم وبعدين امي عندكم ووليد مابيقصر معكم والا عندك شك بكلامي


جت نوف بتفتح فمها الا على دخله وليد : وينك ايمان ابطيتي على الرجال وين عشاكم

ايمان : يلا ثواني بس تكفى وليد روح عنده شوي عبال اجهز الطاوله

وليد : اوكي لا تتأخرين

جهزت الطاوله ونادت الكل .. جلسو نوف وناهد قريب من أخوهم بعد مااتحجبو بدأو بالأكل والسواليف عن الشركه والأعمال .....


أم ماهر : الا متى راح تحددون زواجكم يااصيل

فع نظره لها متفاجئ لانه متوقع انهم يأجلون لوقت طويل : والله ياخاله الوقت اللي يريحكم

أم ماهر : اسمعني يا أصيل والكلام موجه لك بعد ياوليد وانتي يا ايمان صحيح ان حفيدي ماكمل شهور من توفى لكن الحي ابقى من الميت

وش رايكم يكون الزواج في بدايه الاجازه الصيفييه لين متى بنأجل يعني الحزن بالقلوب خلونا نفرح ولو شووي

ناظر وليد بأمه .. ابتسم وكأنه يأيدها وهو عارف ان قلبها مازال يتألم على ولدها اللي حالته ماتسر ومهند اللي فقدناه بلمح البصر

أيمان : يمه .. وماهر ؟؟

ام ماهر : وش فيه ماهر يابنتي هذا هو عايش ويشتغل يعني مانقص فيه شي ودايم ادعي له ان الله يربط على قلبه ويغير حاله من احسن لأحسن توكلو على الله وحددو زواجكم

أصيل : على خير ياخاله الله يكتب اللي فيه الخير




اليوم الثاني بالمدرسه


الكل صف طابور وبعد الاذاعه المدرسيه طلبت المديره من المعلمات يفتشون الطالبات واللي مخالفه يرسلونها للإداره ..

وبالفعل طلعو بنات كثييير ومن ظمنهم الهنوف مراييل ضيقه واظافر طويله اكسسوارت ومكياج ..

اجتمعو الطالبات عند باب المديرة ولا أحد فيهم مهتم الا بعض من الطالبات لانهم يخافون يستدعون أولياء أمورهم

قبول : وش جابك يابتول غريبه اول مره اشوفك مخالفه ههههههههههه

الهنوف : انا مو البتول انا توأمها الهنوف خخخخخ هذا وهي بفصلك ولا قدرتي تفرقين بينا

قبول : وجع انتم لحستو مخي الحين وشلون افرق بينكم

بزه صديقه الهنوف : الا احنا نقدر نفرق بينهم بالشامه اللي على البتول

ناديه : البتول هاديه وصقعت الهنوف على راسها أما ذي اوووم الرجه يالبى بس

الهنوف : احم لا داعي لا داعي الحين وش بيسوون فينا

قبول : بما انك جديده عالاداره أخليك تكتشفين بنفسك وش بيسوون فينا هههههههههههههههه

المديرة: ادخلو المكتب يلا قدامي ولا اسمع نفس وحده فيكم

قبول : هلا والله مديرتنا من زمان عنك

المديره : ادخلي ياقبول وتعوذي من شري ترى اللي باقي لك تعهد واحد وراح افصلك واستدعي ولي أمرك

دخلو الكل وبدت المشرفه والمديره يعاتبونهم على مخالفاتهم ...

المشرفه فوزيه : يلا كل وحده تقرب مني وهي ماسكه بخاخ الوان ..

تقدمو البنات منها واللي تترجاها واللي تقول ان ماعندها مريول ثاني واللي يضحك عالأشكال اللي اترسمت على مرايلهم ..

تقدمت قبول والمشرفه ماقصرت بمريولها لعبت فيه لعب حتى اكمامها ماسلمت من البخاخ والبنات طايحين ضحك عليها ..

اشرت مكان فاضي للمشرفه : ابله تراك نسيتي هالمنطقه مومعقوله ماشفتيها

المشرفه : اقول لفي اعطيني ظهرك وبخت عليها وهي ترقص ..

طلعو البنات بعد ماكتبو تعهد انهم مايخالفون ثاني مره وراحو فصولهم



بفصل البتول


كانت معلمتهم غايبه طلعت دفترها وبدت ترسم فيه وتكتب كلمات جت عندها حصه وجلست تراقبها ..

ابتسمت البتول : تبين شي حصوص ..

حصه : لا أبد سلامتك بس حبيت اشوف رسمك ماشاء الله حلو

البتول : الله يحلي أيامك ورجعت تكمل اللي بيدها وبعد ماخلصت وقعت عليها وكتبت اسم حصه ومدتها لها

حصه : وش ذا يالبتول

البتول : ماتغلى عليك

حصه : مشكوووووره يالغاليه والله انك تهبلين

البتول : تسلمين ياعسل قاطعتها حصه وهي تسأل : وش رايك تجين تقعدين معنا بالشله ترى كل البنات اللي معي حبوبات بالمره وبترتاحين معهم ..

انا دايم اشوفك تقعدين لحالك او بالمقصف تشتغلين غيري شوي وتعالي معنا

البتول : مشكوره ياحصه بس اعذريني ماابي

حصه : وليه طيب

البتول : اعفيني من الإجابه

جت قبول عندهم وهي رافعه اكمامها والياقه تبع المريول : وش تسوين عند القمر

حصه : شوفي وش أعطتني

نظارتها قبول من طرف خشمها : ايه حلو أكيد دامها من يد هالقمر

البتول بصوت هادي : وبعدين معك ياقبول مايأستي مني ؟

قبول : ولا راح ايأس يابعدي

دق الجرس راحت قبول فمكانها وهي تفكر وشلون تقرب البتول منهاا دخلت معلمه اللغه الانقليزيه

مس دوش : good morning

ردو عليها الطالبات

قبول هلا والله مس جالكسي

مس دوش : ههههههه متى بتعقلين

قبول : السنه الجايه خخخخخخخخخخ

بدت المس تشرح الدرس والبنات بعضهم يسولفون واللي منتبه وفي اخر الحصه اعطتهم اختبار سريع عن درس اليوم واللي مابيحله بيتعاقب

مس دوش : كل اللي ماحل بالأختار يكتب لي كلمه

(I failed)

ميه مره وتسلمونها لي بكره

تعالت اصوات البنات معترضين عالكلمه اولا وثاني شي مابيمديهم

مس دوش: عشان ثاني مره تركزون بالدرس

Good bye

عصبت لمى على جود لانها ماخلتها تنتبه للدرس : مابكتب شي لاني من اول اقولك اسكتي ولو سمحتي بكره تكتبينه لي

جود: وش دخلني فيك لا بغيتي تفهمين الدرس كان سفهتيني والا يوم اخذتي كل السوالف قمت تهاوشين

لمى : على تبن واذا ماجبتيه لي بكره ماتشوفين خير

جود : وش بتسوين يعني .. دفتها لمى من عالطاوله وبدت حرب بينهم حاول الكل يفكهم

ماقدرو الا يوم تدخلت قبول لان الكل يهابها فرقتهم عن بعض وهي معصبه : انتم هالحين متأكدين انكم طبيعيات ؟ قسم بالله الاولاد

وهم اولاد ماسوو سواتكم يعلكم ماتربحون

مرت من قدام البتول ولاحظت رجفتها سألتها بقلق : وش فيك البتول ليه ترجفين كذا ؟؟

هزت البتول راسها من غير ماترفعه اصوات صراخهم مازالت براسها هالاصوات تذكرها بأشياء كثيره

حاولت تتماسك قدام البنات لين جت الفسحه دخلت دوره المياة اكرمكم الله وغسلت وجهها وتوضت عشان تهدا وتبعد

التفكير عن راسها جت قبول من وراها : البتول وش سالفتك انت

البتول : مافيني شي تكفين ابعدي عني

قبول : روقي اوكي وطلعت

عصبت البتول من نفسها وحست انها مو لازم تكون على هالحياة (( ليتني اختفي ليتني اموت )

وهي طالعه انتبهت لأختها والشله اللي معاهم والصدمه بعيونها لما شافت مريول أختها

الهنوف : شو رايك بمريولي الجديد هههههههههه جرتها البتول مع يدها .. وش سوى بمريولك كذا

ومو خايفه من امي لاشافتك يارب استغفر الله العظيم بس

الهنوف : اقول ماعليك مني واسوي اللي ابي انتي مالك دخل يالبتول

البتول : انا اختك وتوأمك اكيد لي دخل فيك وبكل اللي تسوينه


الهنوف : ياربي بليتني بأخت معقده ومجنونه اسمعي انا وانتي بالمدرسه مانعرف بعض وراحت لشلتها وخلت البتول ثابته بمكانها وهالشي صار قدام مرام اللي استانست من قلب

الحصه السادسه


ناديه اقول بنات انا بنحاش من تخاويني

بزه : وين تنحاشين خلاص اصبري مابقى الا الحصه الاخيره ونطلع

ناديه : لا مالي خلق وبصراحه ودي اصيع قبل لا ارجع البيت ها مين يخاويني

الهنوف : طيب وين نروح

ناديه : أي مكان بس خذي شنطك معك

لاننا ما عاد بنرجع للمدرسه

بزه : لا تقولين بتطلعين برا

ناديه : أي بطلع

الهنوف : والبواب

ناديه : ماعليك منه أنا اقدر اتصرف ها موافقه

الهنوف : ايه يلا فله هههههههه

طلعت ناديه اول شي وراحت ورا المدرسه بالحديقه الخلفيه ولحقتها الهنوف وقفو عند الشجره الكبيره ..

وبعدين ندو بنوقف هنا يعني طول الوقت

ناديه : لا اصبري الحين واريك وش اسوي راحت نادت المراسه واعطتها فلوس عشان تصرف زوجها من عند البوابه ولما راح طلعو الثنتين يركضون ويضحكون على اشكالهم وهم بالعبايه

الهنوف : ههههههههههه ندو وقفي والله كأننا سبايدر مان وبات مان هههههههههههههههههههههه

ناديه : اسرعي بس خلينا ندخل بهالحاره وبعدين نضبط شكلنا

واول مادخلو وقفو عند البقاله واشترو مويه قالت ناديه وهي تمشي

وش فيها اختك تهاوش اول

الهنوف : ماعليك منها اختي طاير عقلها من يوم وهي صغيره

ناديه : ههههههههههههههههاي وشلون طاير عقلها

الهنوف : انا اقولك وش لون وحنا صغار صار عليها حادث وجلست فتره ماتعرف احد وبعدين يقولون انه رجع عقلها ..مع اني مااظن

ناديه : خس الله بليسك هذي اختك وتقولين عنها كذا

الهنوف : والله طفشتني لا تسوين كذا ولا تفعلين كذا انا لي شخصيتي وماابي اصير مثلها معقده

مرت من جنبهم سياره فيها شباب ورافعين على صوت الاغاني ويستهبلون

الشاب الاول: هلا والله بالحلوات

الشاب الثاني : حياكم تبونا نوصلكم

ناديه : اقول توكل انت وياه لا بالنعال على وجيهكم يمسح ملامحكم البهيه

الشاب الاول : اخس ونعال بعد يعني انتي موب لابسه جزمه ههههههههههههههههههههه

ناديه : تبيني واريك هي عشان تصدق وتتوكل

الشاب الثاني : اقول سلوم هذولا مستقوين وش رايك نركبهم معنا عشان يعرفون وشلون يطولون السنتهم

الهنوف : خير خير وش قلت انا وبعدين بهالبساطه نركب معكم سايبه الدنيا

ناديه : امشي هنو ماعليك منهم

الشاب الثاني فتح الباب وسحب عبايه ناديه فكتها منه بالقوه وهي تركض وتصرخ عالهنوف

: اركضي بسرعه لا يمسكونا هذولا موب صاحيين وصارو يركضون والسياره وراهم لين تعلقت عبايه الهنوف بالجزمتها وطاحت



بالمدرسه ..


جلست البتول تدور اختها عشان يطلعون يمرون خواتهم اللي تأخرو عليهم كثيير راحت عند شلتهم ولقت بزه جالسه : بزه وين الهنوف

بزه : انحاشت هي وناديه من المدرسه روحي يمكن تلاقينها بالبيت الحين

شهقت البتول : وشلون انحاشت مو صاحيه هالبنت الله يعيني عالمشاكل اللي بتجي من وراك يالهنوف

لبست عباتها ومرت على أخواتها وراحو البيت ويوم دخلو مالقو الهنوف خافت تقول لامها والا لعبدالله وتصير مشكله

دخلت اخواتها بالغرفه وهي خايفه على توأمها وفجأه قلبها عورها حطت يدها عليه وبصوت واطي (هنوفي وينك ياعمري )

أمل : وش فيك

البتول : الهنوف ماادري وين راحت

امل : يمكن بيت صديقتها

البتول : لا قالت لهم انها بترجع للبيت وللحين مابينت الله يستر




عند الهنوف بعد ماطاحت جت ناديه وشافت الدم على ركبتها حاولت تساعدها عشان تقدر تقوم من الارض

وعبايتها صارت كلها غبار والحاره اللي هم فيها غريبه عنهم وماتقدر السيارات تدخل فيها

ناديه : امشي خلينا نطلع من هنا بسرعه تأخر الوقت وتلاقي امي تحاتيني

الهنوف : آآآه والله رجلي تعورني مره موب قادره امشس عليها

ناديه : تعرفين هالحاره ؟؟

الهنوف : لا انا مااعرف شي اصلا عمرنا ماطلعنا بروحنا الا مع امي او خواتي الكبار

وش يعرفني وانتي تودينا اماكن ماتعرفينها وشلون بنطلع من هنا الحين

ناديه : امشي نرجع مكان مادخلنا

الهنوف : نسيتي السياره اللي تلاحقنا

ناديه : ماعليك منهم خذي معك حصى واذا شفناهم نرميها عليهم

رجعو مكان مادخلو منه ولا لقو السياره وركضت كل وحده لييتها ...

دخلت الهنوف البيت وعلى طول عالغرفه عشان ماتشوفها امها ..

لقت البنات مجتمعين عند البتول اللي اول ماشافتها أعطتها كف قوي وبعدها حضنتها وجلست تبكي : وين رحتي ياعمري قلقتيني عليك والله بغى قلبي يوقف حرام عليك اللي تسوينه فيني

..دفتها الهنوف وهي معصبه من الكف اللي جاها : لاعاد تمدين يدك علي ماناقصني الا هبالك .. اسمعي يالبتول انا سكت لك بس مااسمح لك تدخلين فيني

امل : هذا جزاتها خايفه عليك

رغد : مااحبك هنوفي ليه تقولين على البتول كذا

الهنوف : اقول ابعدو عني انتم ماعليكم مني

مسحت البتول دموعها : الها يجزاك خير ياا... تبيني اقول اختي والا توأمي والا وش اللي يناسبك

الهنوف : لا تقولين شي

طلعت البتول عشان تحط الغدا وتركت اخواتها بالغرفه ..

غيرت الهنوف مريولها وشافت جرحها الكبير اللي مسك فيه التراب راحت تغسل وتحط عليه مطهر عشان لا تتجرثم ..

وهي طالعه قالت لامل : امي سالت عني

أمل : امي نايمه للحين ماصحت شكلها سوت الغدا ورجعت تنام

الهنوف قولي لاختك الهبله تحط غدانا ميته جوع

امل : من هالهبله ؟؟

الهنوف : من غيرها البتول الزفت

امل : وش اللي غيرك يالهنوف

ماردت عليها وجلست تسمع اغاني وهي تتذكر اللي صار لها اليوم وتحمد ربها انه ماصار لهم شي





العصر ..

جت احلام عندهم وحكت لها امل كل اللي صار عصبت وراحت تشوف وش سالفت اختها

احلام : الهنوف قومي يلا ماشبعتي نوم

الهنوف : يووووه ماتخلون الواحد ينام زين وش عند احلام مصحيتني من الحين

احلام : اقول قومي تعدلي لااعدلك بكف على وجهك ياقليله الحيا .. قامت الهنوف وهي تبرطم .. نعم وش تبين

أحلام : صدق اللي سمعته عن سواياك اليوم

الهنوف : ماشاء الله من هذه السي ان ان اللي نقلت لك الاخبار ...

سحبتها احلام من قميصها وقفتها قدامها وهي معصبه : شوفي وش طولك لكن للاسف مافيك ذره عقل ممكن تفهميني ليه انحشتي من المدرسه

الهنوف : ماانحشت اول مافتح الباب طلعت انا وصديقتي ومرينا البقاله وبعدها رجعت

قرصتها احلام من اذنها : وتكذبين بعد وش فيك انتي انا اشهد انك موب صاحيه

اسمعيني يالهنوف هذي اخر مره اسمع عنك هالسواليف ووالله ثم والله ان تكرر وسمعت عنك شي ثاني لااقول لخالد يتفاهم معك خلاص

انتي موب بزر عشان تنطقين شوفي رغد وشوفي البتول وامل ولا وحده فيهم سوت اللي سويتيه

الهنوف : يصير خير ..


طلعت احلام وجلست مع امها وجت بدور وهي متضايقه من ام زوجها والكلام اللي ترميه عليها كل ماراحت لها راحت بدور للمطبخ تساعد البتول بالقهوه والشاهي

ام عبد الله : اختك شكلها متغير

احلام : من تقصدين يمه

أم عبدالله : بدور من اقصد بعد مصوفر وجهها وناحفه لا تكون حامل وماقالت لنا دخلت بدور بالقهوه وصبت لامها : لا يمه موب حامل ومافيني شي

ام عبد الله : وشلون مافيك شي وكأنك شايله الدنيا على راسك

احلام : أي صدق يابدور شوفي وجهك وشلون

بدور : مافيني شي بس تعبانه مع تغير الجو وقامت لغرفتهم القديمه .. لحقتها احلام تشوف وش فيها ... احلام : وش سالفتك انتي الثانيه

بدور: هههههههههه ليه من الاولى عشان اصير الثانيه وبعدين وراك تكلميني كذا نسيتي اني اختك الكبيره

احلام : لا تغيرين الموضوع علميني وش فيك ..

بدور: قولي وش اللي مافيني يااحلام والله ماعاد اقدر اتحمل ام زوجي وكلامها اللي ترميه علي كل مانزلت لها .. قاطعتها احلام : ليه وش صار بعد ؟؟

بدور : بقولك بس لا تقولين لامي اوعديني .. وعدتها احلام وحكت لها كل اللي يصير معها مع ام زوجه ومع ان زوجها مومقصر معها ابدا لكن تعبت من امه وكل شوي تجيب طاري الزواج

أحلام : وشلون يعني بتزوجه ؟

بدور : تقول لو ماحملت خلال شهرين بتزوجه غصبن عليه

أحلام : وش راي زوجك بالكلام

بدور : يقول ماعليك من كلامها بس هذي بالنهايه امه ومستحيل راح يعصيها

احلام : اذكري الله وعيني من الله خير واللي كاتبه ربي بيصير لا تهوجسين انتي ودام زوجك معك ماعليك شر ان شاء الله قومي نطلع لاتحس امي




ام عبد الله : كان ماجيتو جالسين بداركم ومخليني هنا بالحالي

بدور : السموحه يمه والله دخلت اعدل وجهي وكحلي اللي ساح من حراره المطبخ الا وين عبد الله

أم عبد الله : وينه بعد ياقلبي عليه يطلع من الصبح يدور له على شغل ومايرجع الا وهو منهد ويحط راسه وينام ..

أحلام : زين والله خليه يشتغل ويبدا يعتمد على نفسه الا يمه وش اخبار بيت عمي من زمان عنهم

بدور : كلمتني ايمان تقول انهم حددو زواجها على بدايه الاجازه وعزمتنا يوم الخميس الجاي

ام عبد الله : ايه كلمتني ام ماهر وعزمتني كانكم بتروحون رحت معكم ودقي على مره اخوك وخليها تجي معنا ..



اذن العشا وقام الكل يصلي وقررت بدور تعزمهم على اكل من برا

بدور : اختارو اللي تبونه وانا بدفع

الهنوف : وش هالكرم ياحاتم الطائي النسخه المؤنثه

أحلام : وجع بلسانك ياتبنه اذلفي لا بارك الله فيك مافي اكل عقابا لك لين ما يتعدل اسلوبك

امل : وااااااااك تستاهلين ياام لسان

استغربت بدور من طوله لسان اختها ماعمرها سمعت وحده فيهم تقول هالحكي : وش فيها هذي البنت صايره ملسونه

احلام وبيدها المنيو : ماعليك منها هذي تتعلم مع بنات المدرسه الله يصلحها بس يلا اطلبي قبل لا يجي رجلي واروح

بعد العشا جلسو يسولفون وينكتون على رغد وهي تستهبل وتقلد وحده بالتلفزيون هاوشتها ام عبد الله ونادت البتول عشان تنومها

رغد : بتووول قولي لي حكايه

البتول : وش تبين من حكايه ياحلوه

رغد : تقدرين تقولين لي حكايه بابا

فتحت البتول عيونها مستغربه من الطلب اللي طلبته رغد .. وش جابه على بال هالصغير اللي ماشافته زين

سألتها بحذر : وليه تبين قصه بابا قاطعتها رغد وهي تغطي على عيونها كأنها تحلم : صديقاتي بالمدرسه يقولون ابوهم يوديهم الملاهي

ويشتري لهم كل اللي يبونه ويجي ياخذهم من المدرسه والله والله انا شفت هند

وابوها يحضنها ويعطيها حلاوه وبعدين رككبها قدام بالسياره

تجمعت الدموع بعيون البتول وهي تقول : شوفي حبيبتي بابا سافر عشان عنده شغل كثيييير ومايقدر يجي هنا يمكن لين تكبرين

لكن اذا سمعتي الكلام وغمضتي عيونك بقول لتركي يوديك الملاهي يوم الاربعاء ويشتري لك كل اللي تبين ها وش رايك بالفكره

صفقت رغد وحضنت اختها من الفرحه : احبببببك شكرا مرررره ههههههههه

مسحت البتول على شعرها وجلست عندها لين نامت لحفتها زين وطلعت تشوف اخواتها





عند تركي بالنادي :


وبعدين معك يابدر قلت لك انا توني جاي من السفر مالي كم شهر وتبيني اسافر معك الحين ودوامي وش اسوي فيه معليه يالخوي مااقدر

بدر : هي كلها 4 ايام ابيك معي يالشيين

وقف تركي الجهاز ومسح وجهه العرقان : اعذرني يابدر غير شغلي مضغوط مع الاهل شوي

بدر : عذرك معك اجل بشوف واحد من اخويانا كانه فاضي يروح معي ودي اغير جو شوي من الشغل والبيت والجامعه ..

.

تركي وهو طالع : الله يسهل عليك ولا تنسى موعد استلام العقود بعد شهر لازم تعبي الاستبيان عشان لا يروح عليك العرض .فمان الله



ركب تركي سيارته وبعد ماشغلها انتبه ان جواله مومعه وتوقع انه نساه بغرفه التبديل

الا بدر يأشر له عالجوال : يالحبيب جوالك ههههههههههه نزل تركي وهو يضحك على استهبال

بدر : ههههههههههههههه مشكور ياالخوي ماننحرم من هالطله

بعد ماوصل للبيت وبدل ملابسه طق الباب : ادخل

دخلت البتول وهي منحرجه من اخوها لانها تعرف مايحب احد يدخل غرفته سواء كان موجود فيها او لا :

تركي ممكن اقولك شي ؟

عدل جلسته : قولي وش تبين

البتول : معليش بس ابي اقولك ان رغد بس قاطعها تركي : وش فيك تبسبسين قطو انتي احكي عدل والا اطلعي ابي انام

البتول : ها لا بس كنت ابي اقولك عن رغد انها سألت عن ابوي اليوم وحكت له السالفه بالمختصر

تركي : وعلى كيفك تقولين لها اني بوديها الاربعاء

البتول : لا بس ماكنت ابيها تفكر كثير وانت ادرى فيها صغيره ولا تفهم

تركي : انزين لا جا يوم الاربعاء يصير خير

تقربت البتول من اخوها وحبت راسه : مشكور ياخوي وطلعت

انسدح تركي وهو يفكر باخواته صحيح هو يحبهم لكن الزمن علمه القسوه والجمود لازم يصير كذا عشان يعيش ..

امه ماخلت احد فيهم مرتاح ولو ماصار لي شخصيه كان مسكتني الباب مثل ابوي الله يذكره بالخير ...

صح نسيت اقول لبدور ان ابوي يبيها ..بكره ادق عليهها واعلمها وحط راسه وناام



الجزء الثاني من الفصل الرابع



مرت الاختبارات على خير والكل كان فرحان بنتيجته ما عدى الهنوف اللي مااهتمت لتفوق اختها

كلم عبد الملك خالد وتركي وعزمهم على الشاليهات بالشرقيه لمده اسبوع كامل

تركي : انا مااقدر اروح عندي ضغط بالشغل لكن اذا خلصت قبل لا تجون مريتكم

خالد : تم يالنسيب الله يكثر خيرك ويغنيك

عبد الملك : خيرك سابق يابو دحوم خلاص اعطي خالتي خبر عشان يجهزون انفسهم لان بنمشي يوم السبت الجاي يعني بعد 3 ايام ..

خالد : خلاص خلي الاهل علي انا بعد شوي بمرهم وابلغهم يلا توصون على شي

عبد الملك : ابد سلامتك

تركي: بتروح للبيت الحين

خالد : اول بمر بيتي بااخذ الاهل معي

تركي : اوكي نلتقي هناك اجل




مر خالد على زوجته وولده وكلم احلام وخلته يمرها بعد

حكى خالد لامه عالسفر

ام عبد الله : وشلون نسافر نسيت زواج بنت عمك بعد اسسبوع

خالد : حنا بعد سفرتنا اسبوع وراجعين قبل الزواج ان شاء الله

احلام : طيب ما يمدي نشتري شي نلبسه للزواج ..بدور مخلصه من زمان لكن انا مع دوامي و
هالبنت الصغيره ماني عارفه اشلون اقسم وقتي

خالد : يمديكم ان شاء الله بكره امر عليكم من العصر ونروح جميع ومنها تاخذون لكم كم غرض للسفر

........

........



كانت تفكر بالكلام اللي قالته لزوجها ورفضها انها تنزل معاه لبيت امه ماتبي تسمع أي كلمه يسم بدنها وخايفه بنفس الوقت

من كلام عمتها (ام زوجها) دق جوالها شافت الرقم وماردت وتكرر الاتصال مرتين وكل شوي تحطه صامت مالها خلق احد ولا حتى خواتهاكل اللي تبيه انها تختلي بنفسها شوي

وتبدأ ترتب أمورها قطع سرحانها عبد الملك : الحلو وش فيه زعلان

بدور : لا أبد مو زعلانه بس !!

عبد الملك: بس ايش يابدور قولي كل اللي تبينه

قامت بدور وهي خانقتها العبره : عن اذن راسي يوجعني وابي انام شوي ودخلت غرفتها وتركته بحيرته

مهما حاول يفهمها انه شاريها ومايبي غيرها لكن هذا هم الحريم من تطري عليهم الحرمه الثانيه يتبدلون بحال ثاني الله المستعان ...



بيت ماهر :



وبعدين معاك يا ماهر ماصارت عيشه كل يوم هواش واصواتنا واصله لاخر الشارع ما مليت

ماهر : هذا بيتي بكيفي اسوي اللي ابيه وانتي مالك شغل فااااهمه

اميره : وش اللي غيرك علي ... وقفت قباله ودمعتها تطيح على خدها بكل الم من زوجها اللي صار قاسي بشكل موطبيعي :

ناظرني ياماهر انا اميرة اميرتك ياقلبي ليه صاير تعاملني بهالقسوه حرام عليك اللي تسويه

فيني وفي العيال

التفت ماهر ومسكها من كتوفها بأقوى ماعنده وصار يهز فيها تغيرت ايه تغيرت واللي موع اجبه الباب عندك ودفها عالكنب ..

جلست اميره تصيح على حب حياتها اللي من بعد مافقدو مهند وهو متغير حتى روئ من انولدت

ماشالها الا مرتين الله يحنن قلبك علينا يالغالي ...



بشقه طلال ...

وش رايك بهالصنف عبود ؟؟
ضحك عبد الله وهو يترنح من كثر الشرب والسقاير اللي حرقت صدره : تماااااااام تكفى خلي هالجلسه الحلوه كل يوم وانا علي المزات ههههههههههههههاي

طلال : لا مانبي بنات بهالشقه موناقصين شبهات خلينا كذا احلى

عبد الله : اييييه احلى واحلى وكمل شرب بهالسم وهو مو عارف ان طلال ناوي له على نيه يخليه يتمنى انه ماانولد ..




اليوم الثاني ...


راحو الكل للسوق ومعاهم احلام وام عبد الله ومريم وبدأ يدورن فساتين للزواج

لقت البتول بدله عجبتها حيل عباره عن دقله وبلوزتها فيها كريستال وبنلطون يجي ماسك من فوق وواسع من تحت نادت الهنوف لانهم تعودو

يلبسون مثل بعض

الهنوف : وااو حلو مره بس وش راي باللون التركواز

البتول : لا الليلكي احلى مع لمعه الكرستال

الهنوف اوكي بروح انادي احلام عشان تجيبه لنا وانتي دوري على اكسسوارات حلوه لي ولك

رجعت البتول للمحل وجلست تشوف الاكسسوارات اللي معلقه رجعت على ورا وهي محتاره وش تختار الا تحس انها صدمت باحد وراها ..

اااسفه وهي منزله عيونها والشخص اللي قدامها واقف ماتحرك .. االبتووول ..

!!!!

انا ناهد ياوحشه وش اخباركم تكفين وين امل

ابتسمت البتول على رجه بنت عمها وقالت بصوت واطي : الحمدلله بخير شوفي امل بالمحل اللي قبالنا مع امي ..

ناهد : اوكي .. وليد انتظرني هنا تكفى دقايق بشوف امل وارجع لك وراحت قبل لا تسمع منه أي كلمه ضحك وليد على اخته والتفت للبتول : وش اخبار يابنت العم

البتول : بخير

جلس وليد يتأمل الاكسسوارات اللي معلقه وهو يناظر للبدله اللي ماسكتها البتول ..

نزل عقد لونه فضي وفيه كرستاله تلمع ومده لها .

البتول : ايش هذا ؟؟

وليد : خذيه هذا يناسب البدله اللي ماسكتها بيدك

نزلت البتول راسها وهي متضايه من هالحركه .. مد وليد يده وهو يقول الين متى بتقعد يدي ممدوده خذيه طيب ..

البتول : لا ماابي

وليد : ممكن اعرف ليه

رفعت عينها البتول وناظرت فيه واللمعه اللي ماتفارق عيونها : ترضاها على خواتك ؟؟

وليد بتعجب : وش اللي ارضاه ؟

البتول : ترضى واحد من اخواني يعطون اخواتك وهم موب محارم لهم ؟؟

فهم وليد وش قصدها .. حط السلسال عالطاوله وقبل لا يطلع كلم الكاشير باذنه وطلع

جت احلام واخذت اللي يبونه وجت بتحاسب الا الكاشير رفض ياخذ منهم شي وان الحساب مدفوع

احلام : وشلون مدفوع من اللي دفعه ؟

الكاشير : ابن عمك وليد الفلاني

الهنوف : وش جابه هنا وش دراه اننا بنشتري من هالمحل وليه يدفع من الاساس

الكاشير : اهوا اجا هون وكان واقف مع المودموزيل هادي واشر عالبتول اللي انصفق وجهها من نظرات اخواتها ..

اخذوا الاغراض واصرت احلام انها تدفع وكانت ساكته طول الوقت

خالد : بنات اخذتو لكم شي للشرقيه ؟؟

احلام : لا والله تونا مخلصين من اغراض الزواج الحين بروح اشوف لرغد وامل والبتول والهنوف يختارون بروحهم ...

الهنوف اختارت بلوزتين مع بنطلونين جينز واحد اسود برمودا والثاني سماوي

اما البتول عجبتها برموده للركبه اخذته واخذت عليه تيشيرت طويل لنص الفخذ واسعه ولونها رمادي وعليها بنت لابسه نظاره

واخذت لها بنطلون ثاني وسيع وشرت لها ولاختها بجامات برموده شكلها كيوت

جتها ام عبد الله : وريني وش شريتي .. طلعت البتول الملابس من السله وورتها امها

ام عبد الله : وش ذا الحين بتلبسين ذا القصير لا لالا رجعيها وبعد هلابلوزه موب زينه رجعيها وجيبي لك شي سنع بلا قله حيا ..

البتول : بس يمه انا بلبسهم مع البنات ماراح اطلع فيهم برا

ام عبد الله : انا قلت لا والا ماتسمعين الكلام بسرعه اذلفي رجعيها لا بارك الله فيك

عصبت البتول ورجعت كل اللي شرته وخلت البجامات معها

بعد ماحاسبو عزمهم خالد لكن امه قالت له يجيب الاكل وياكلونه بالبيت احسن ...

بعد ماتعشو قالت بدور لاخواتها يروحون يقيسون الملابس عشان يمديهم يرجعونها لو كانت وسيعه او ضيقه قامو الكل ماعدى البتول

احلام : ليه مارحت مع البنات تقوسين ملابسك

البتول : ماجبت شي

احلام : وشلون ماجبتي شي واللي وريتيني هم وينها ؟

البتول : امي قالت ارجعها .. التفتت عليها ام عبد الله وهي معصبه : انا قايله لك رجعيها كلها والا القصير يا قليله الحيا

البتول وهي معصبه : وانا ريحتك يمه ورجعت كل اللي شريته معد ابي شي وراحت لغرفه الغسيل ..

لحقتها ام عبد الله والعصا بيدها من غير ماينتبه عليها احد : ماشاء الله من متى طال هاللسان ..

البتول : الله يهديك يمه ماطلوت لساني بس قلت لك اني رجعت الملابس اللي ماعجبتك

ام عبد الله : من زمان هالعصى ماجا على جسمك عشان كذا طال اللسان وبدت تضرب فيها والبتول تصيح وتترجاها ..

الله يخليك يمه كافي الله يخليك وامها ماقصرت وكأنها تقولها زيدي

لين مامسكت البتول العصى بيدها : كافي يمه كافي حرام عليك وش سويت لك عشان تسوين فيني كذا انا بنتك يمه تكفين ارحميني

ام عبد الله : وانا اكرهك تعرفين .. اكرهك واكره ابوك معك اكرهك لانك نسخه ثانيه عنه اكرهك لانك تذكريني فيه وفي الماضي اللي مخبينه عني

البتول : خلاص وديني عنده واوعدك ماعاد تشوفين وجهي خير شر .. ابي اروح عند ابوي .. ابي اعيش عنده واقوم فيه دامك تكرهيني يمه

عصبت ام عبد الله زود ورجعت تضرب في البتول بطريقه مو طبيعيه ..

دخل خالد على امه بعد ماسمع كلامهم ومسك العصى عنها وطلعها من الغرفه وبعد ماحس انها هدت شوي رجع للبتول :

لا حول ولا قوه الا بالله ... وش

اللي صار وخلاها تمد يدها عليك يالبتول

البتول : خالد تكفى نخيتك ياخوي ارحمني والله ماسويت شي كل هذا لاني رجعت الملابس اللي شريتها وماعجبتها وهذي الهنوف شرت نفس لبسي ولا قالت لها شي

الله يخليك ياخوي ضمها لصدره والبتول تصيح وبنفس الوقت متضايه وتبعده عنها وهو مستغرب من اخته وحركتها لكن مايقدر يسألها الحين بسبب وضعها اللي هي فيه ..

خالد : اسمعي ياحبيبتي انتي صرتي كبيره الحين وعمرك 14 سنه وموب لازم اعيد لك ان سيره ابوي ماتجيبينها خير شر قدامها وحاولي تتحاشينها قد ماتقدرين عشان ماتسوي اللي سوته قبل شوي .. اذكري الله

حبيبتي وتعوذي من الشييطان وادعي عسى الله يهديها ويحنن قلبها عليك .. حب يضحكها .. شوفي شعرك بدى يطلع فيه الشيب ههههه

البتول : هههه مشكور ياعزوتي حبت راسه وطلعت تغسل وجهها .. دخلت عليها احلام وهي تغير ملابسها وعلى طول نزلت كم البجامه تخفي فيه الاثار اللي على جسمها : وريني ؟؟

البتول : مافيني شي ..... مسكتها احلام من كم بجامتها مو علي هالكلام يالبتول خليني اشوف .

.شهقت يوم شافت الكدمات على جسم اختها حسبيي الله على ابليس استغفر الله العظيم وش ذا وليه ماحميتي نفسك ليه استسلمتي لها يالبتول

ضحكت البتول باستهزاء وصوتها ماليه الالم : تصدقين يااحلام ماعاد احس عشان ادافع عن نفسي

تكفين طفي النور وخليني انام ..تقربت احلام منها وجلست تحط الدوا على جروحها سمعتها تتمتم بكلمات سألتها بهدوء: وش تقولين

ردت البتول بصوت ناعس : باقي كثير ؟

احلام : على ايش !!

البتول :ع الراحه .. وبعدها نامت






يوم السفر ..



توجهت السيارات على طريق الشرقيه اخذت بدور البنات معها عشان ياخذون راحتهم ولان عبد الملك من النوع البشوش والمرح يحب الضحك والوناسه ..

امل : ياليت ناهد معنا كنا بنفلها سوا

بدور : مع خواتك فليها واستانسي معهم واي شي تبونه لا تستحون

ررغد : بدور حنا بنروح البحر ؟؟

التفتت بدور عليها وحملتها وخلتها عندها قدام : ايه حبيبتي بنروح للبحر عشان تستانسين وتلعبين

فرحت رغد وجلست تنط مكانها ضحك عليها عبد الملك وناظر لبدور اللي تفهمه من غير مايتكلم ..

الهنوف : بتول وش فيك ..

البتول : مافيني شي حبيبتي سمعها عبد الملك وحب يونسهم : البتول ماعندك شي تقولينه لنا

البتول مثل ايش ؟؟

بدور : يقصد شعر خاطره أي شي من اللي تكتبينه

البتول : في ..

طفى عبد الملك السي دي : يلا سمعينا ياشاطره واذا عجبني لك اللي تبين




انطفى نور السعاده يوم حسبته ضوى
وابتدت ايام عمري تنطفي بين الوتين
اشتعلت بعود نار ومال يدي به نوى
والعذاب اللي لمسته مثل اجهاض لجنين
والرياح تشد فيني يوم عودي به قوى
وعودي اصبح من رياحي يميل بشمالي ويمين
لا تقول اني صغيره والحزن توه بدى
انا حزني من عرفته عضد بكفي يمين


من تأليفي ..




سكت الكل التفتت بدور على زوجها تبيه يسعفها بأي حرف حست ان اختها تعاني وهي ماهي قادره تسوي لها أي شي

عبد الملك : بصراحه ابدعتي يالبتول عندك قدره عالوصف بطريق ممتازه جدا ويلا دام انه عجبني اختاري وش تبين اجيب لك

البتول : سلمت ماابي الا سلامتكم

قاطعتها بدور: لا يلا قولي ولا تنحرجين من عبد الملك

الهنوف : عادي اختار بدالها بما اني توأمها هههههههههههههه ضحك الكل عليها ورمتها بدور بعلبه المناديل وجلسو يصفقون ويرقصون والوناسه ماليه السياره



خالد : اقول مريم دحومي ناقصه شي

مريم : لا حبيبي مو ناقصه شي بس اسأل خالتي واخواتك

خالد : اخواتي مع بدور وماهيب مقصره معاهم وامي نايمه خليها لي صحت سألتها

مريم : كم باقي لنا ونوصل

خالد: ساعه بالثير واحنا واصلين ليه تعبتي

مريم : اوجعني ظهري شوي

خالد: تحملي حبيبتي قربنا نوصل



كانت ام بدر صاحيه بس مافتحت عيونها وتفكر بالماضي يوم تزوجت وجابت خالد كانت حيل صغييره لكنها اعتمدت على نفسها

بكل شي مع ان زوجها موب مقصر معها بشي وكل اللي تبيه ينفذه لها لكن كانت تنقهر من

بروده الزايد وبعد السنين اللي عاشتها معه ماتحملت وطلبت الطلاق طلع ابو خالد من البيت وسافر لي هدت يرجع ويعقلها ..

تفاجأ ابو خالد من اتصالها وطلبها الطلاق بأسرع وقت تبي الورقه لانه بيجيها خير منها وتقدر تعيش هي وعيالها

ابو خالد : وبعدين معاك يافاطمه لا تخربين بيتك بيدك وبعدين البيت كله بنات وبحاجتي وانتي ناويه تبعديني عنهم

ام عبد الله هذولا عيالي ياصالح وانا اللي بربيهم وانت ماقصرت كفيت ووفيت الحين ابي ورقتي

ابو خالد : يامره تعوذي من ابليس وشلون تعيشون بروحكم

ام عبد الله : وش ابي فيك انت موب رجال وهالبيت انا بقوم فيه وبتشوف ياصالح

ابو خالد : انتي طالق

سكر السماعه معصب وشايل هم بناته اللي يذوقون الويل من امهم قدام عيونه ولو هاوشها علت صوتها وطردته من البيت ..

قالت بنفسها ( صح تحملني بس انا ابي رجال مثل ماتعودت مع اهلي .. ) كانت تبي ترمي حمولها على زوجها مثل ماكانت امها تسوي مع ابوها ..

لكن العيال بدو يضيعون مافي احد يقدر عليهم مثل اول .. توك تفكرين يافاطمه !!



بعد ماوصلو حطو غداهم وبعدها راحو يريحون والبنات يتمشون بالشاليه الكبير راحو للمسبح وجلسو يلعبون فيه واحلام وبدور يسولفون وحكت بدور عاللي صار بالسياره

احلام: بتتعود يابدور كلنا مرينا مثل مامرت صح البتول بزياده وعشان تشبه ابوي كثير بتصرفاته واطباعه وهذا اللي خلا امي تزيد عليها لكن مابيدنا حيله تقدرين توقفين بوجه امي ؟

بدور : لا والله مااقواها الله يسامحها لكن ..

احلام : لكن وشو يابدور

بدور : مو وقته يااحلام خلي كل شي بوقته



عند الرجال


نام عبد الملك وجسار وبقى خالد صاحي فكر اني يدق على عبد الله ويحاول يتقرب منه لو بالمكالمه يمكن يحس ا ن وراه احد

خالد : هلا والله عبد الله وش اخبارك ياخوي

عبد الله : هلا انا بخير ماعلي

خالد : وينك فيه الحين ؟

عبد الله : بالاستراحه مع اخوياي ولو سمحت ياخالد لا تقول لتركي يلحقني انا كبير الحين واقدر اعتمد على نفسي

خالد: ماقلت شي ياخوي وانت كبير ماشاء الله واقدر اعتمد عليك بعد

عبد الله : تسلم أنا مشغول الحين اذا فضيت كلمتكم .. وصلتو ؟

خالد : ايه وصلنا بس متى مافضيت دق على امي وطمنها عليك لانها طول الطريق وهي تحاتي

عبد الله : زين مع السلامه وسكر من قبل لا يسمع سلام اخوه

خالد: لا حول ولا قوه الا بالله العلي العظيم هالولد منتهي بالحيل

التفت له جسار : عادي ياابو دحوم كل اللي بسنه كذا بس خلكم مراقبينه ليكون يتعاطى شي

خالد : لا الله لا يقوله توه صغير على ذا الشي

جسار : من يقول عبد الله كبر ياخالد ماعاد هذاك البزر اللي تطارد وراه بالحاره صار رجال وش طوله والخراب بكل مكان

خالد : الله يستر بس لا رجعنا اشوف وش اسوي معه

لبس الكل وطلعو يتمشون وهم مستانسين عالاخر والجو روعه ومافي احلى منه وكل يوم يزورون مكان




بيت ام ماهر :


الكل حايس بزواج ايمان والترتيب لانه راح يصير بالقصرماتبي زواج كبير وولد اخوها توه متوفي

ايمان : يمه تكفين قولي للخدامات يشلون هالكراسي اللي هنا ويصعدونها بالصاله اللي فوق

ام ماهر : ماعليك انا بتصرف انتي هدي حالك وتونا باقي 3 ايام عالزواج بيمدينا حبيبتي

نوف : ايمان

ايمان : ياعيوني انتي امريني وش تبين

نوف وهي تهز رجولها بحركه سريعه : تسمحين اتكلم مع شوي

تركت ايمان اللي بيدها وراحت لاختها ومسكتها : يلا على غرفتي نسولف ونحكي على راحتنا اوكي

ابتسمت نوف طيب



تعمقت علاقه ناهد بالشات وخاصه مع البيق بوس لدرجه انها اضافته بالمسن وصارت تقضي اغلبيه وقتها بالسوالف معاه

ناهد : وبعدين معاك انت وسواليفك هذي

مازن : وش فيها سواليفي بعد كم لنا متعرفين على بعض

ناهد : اوكي بس صعبه مااقدر اقابلك

مازن عادي يابنت الحلال لو يوم في مجمع يعني عام موب لحالنا

ناهد : مممممم افكر مع اني مااوعدك يلا بروب بروح اشوف اهلي

مازن : تيت ياقلبي

جلست ناهد تفكر هي صح بديت اميل له لكن ماابي اخو ن اهلي يكفي هنا بالمسن وبالشات طلعت من الغرفه وتركت لابها مفتوح



عند ايمان


قولي حبيبتي وش عندك

نوف : لا تروحين

ايمان : نوف حبيبتي انتي الكبيره وماتوقعتك بتسوين كذا والله توقعت العكس لان ناهد صغيره ومتعلقه فيني لكن انقلبت الايه ..

نوف : البيت بيفضى علينا مافي الا انا وناهد وامي ووليد

ايمان : وين المشكله طيب ولا تنسين اني بمركم كل يوم اتطمن عليكم واخذ اخباركم وهذا بيتي قريب كل ماطفشتي جيبي اختك وتعالي مع السواق

نزلت نوف راسها وهي مو قادره تشرح لاختها اللي بقلبها جلست تناظر غرفه ايمان وتسريحتها الفاضيه والشنط اللي حاطتها على جنب بيتقلونها بكره المغرب

نوف : اوعديني انك كل يوم تجينا عشان مايتغير عليينا الوضع

قربتها ايمان لها وهي تقول : وعد يانوف بس توعديني انك تتغيرين ؟

نوف : وعد




دخل وليد غرفه ناهد بغى يسألها عن محل الشكولاته اللي تحبه

لقى لابها مفتوح ولقى المسن ينور ماحب يشوف خصوصيات اخته لانها صغيره وثاني شي واثق فيها

تبي شي وليد!! ارتبكت ناهد وهي تتقدم من جهازها وتحاول انها تسكره عشان مايشوف شي

وليد : لا بس جيت اسألك وش اسم المحل اللي يبيع شكولاته

قالت له وهي تحاول تضبط وضعها ويدها المرتجفه: اممم اتوقع انه شكولاين او شي زي كذا

وليد : هههههه طيب يلا حبيبتي تبين اجيب لك شي وانا جاي

ناهد: لا سلامتك .. بعد ماطلع وليد اتنفست ناهد بقوه وهي تقول : اووووف الحمدلله ان وليد ماشاف شي كان انا بقبري اليوم..



وش اللي ماشفته ياناهد

ناهد : وليييد !!!!!!



نكتفي بهذا القدر واعتذر عن التأخير


ودي ....